Unner Wei
E Wei wöchst doe üm Hammelburg; ich wollt, ich hält e Fooß voll
Er dürfet vo der Leiste sei - oder a vom Oufetool.
Vom Sooleck wär' er a nit schlacht, vom Liewetool, vo Fürtel
Vom Kummersbach, vom Trautlestool: es git sou schöäne Viertel!
Un biste krank un fad un a nou widerwartig
No trinkste ner vo unnerm Wei, du freest dich deiner Lattich.
Dar lößt es Gekrötz, es Geknöich vergeß; en annerer Karle biste
Un wos dich kränkt und wos dich plogt, dos olbere Zeug vergißte!
Un hoste aa om annere Tog emol en schwere Häuwel
No weß ich dir dos eene drauf: en Wei vo unner Träuwel! -
Sou hol der Herr ins schöäne Land der Sool, der Burge und Schlösser
En beste Wei nou hiegesetzt Jetz' sog, wu findst es besser?
Ee Durf ner hot, ich muß geklog', e sauersch Zeug om Hügel'
Dou wie dos Durf heeßt, sog ich nit, ich fürch mich für die Prügel.
Do wor vor viele hunnert Johr die schöänste Fraa grod rümedüm
Die is om saure Moust ner schuld; ich hoo's euch aufgeschriem.
Sie wor sou schöä, ner es eene bloß - sie ment, sie hät es Maul ze groß
Em Herrgott git' se gor kee Ruh, sie tut un batt un knöicht
Un hunnert Mol secht sie em vür, daß sie e Mittel möicht.
Der Herrgott - suns e gueter Moo - dar wor e weng erbost:
„Dar Hoffartsgees, dar war ich g'hölf!" un git ere en saure Moust. . .
Un wenn de meenst, ich lüg dich oo, mit mir in dos Dürfle kumm!
Un keff der doo e Seidle Moust - daar zieht dei Gusche zomm!
K. Schneider, München